Musika herrikoi eta sustraidunaren aldeko apustuan tinko jarraituz, Getxo Folk jaialdiaren 41. edizioak programa oparoa aurkeztuko du irailaren 10etik 14ra. Guztira 13 kontzertu eskainiko dira hiru gune desberdinetan, horietatik bost ordainpekoak izango dira Muxikebarrin eta gainerakoak doakoak Areetako Geltokia plazan eta Ereagako hondartzan.
Jaialdiaren hasiera Xabier Zeberioren Pause proiektuagaz izango da irailaren 10ean, Andrés Isasi musika eskolako ikasleen parte-hartzeagaz. Hurrengo egunean, Estrella Morente flamenkoaren ikurretako bat taularatuko da berriz Getxon. Irailaren 12an, Capercaille talde eskoziarrak folkaren eta pop-rockaren arteko zubia ekarriko du oholtzara. Eta hilaren 13an, Carminho portugaldarraren fadoak girotuko du Muxikebarriko agertokia, tradizioa eta berrikuntza uztartuz.
Amaiera ekitaldi berezi bategaz borobilduko da jaialdia: Hunkidura kuttunak, Benito Lertxundiri eskainitako ikuskizun multidiziplinarra izango da, Kukai Dantza eta Arkaitz Hormaetxeren zuzendaritzapean. Bertan, Mikel Markez, Idoia Asurmendi, Janus Lester eta Mirua izango dira, Lertxundiren obra belaunaldi berriei hurbiltzeko asmoagaz.
Gazteentzako proposamena izango da aurten ere Ereagako hondartzan: irailaren 12an Chambao ariko da eta 13an Muerdo. Bi kontzertuak gaueko 22:00etan izango dira, doan.
Jaialdiaren barruan, Areetako Geltokia plazan eguneko ordutegietan izango diren doako kontzertuetan La West Bluegrass Band, Erromintxelak, Hutsun Txalaparta, Sensei Music Ensemble eta Deira Band arituko dira. Haurrentzako musika-ludotekak eta Ene Kantak taldearen ikuskizuna ere izango dira bertan. Gainera, hilaren 13an eta 14an Black Raven Pipe Band irlandar gaita taldearen desfileak ere izango dira ikusgai.
Getxo Folkek aurten ere musika herrikoia eguneratu eta askotarikoa proposatzen du, publiko guztiarentzat pentsatutako formatuan. Ordainpeko kontzertuetarako sarrerak dagoeneko eskuragarri daude ohiko kanaletan.