Azokako bisitariek goiz osoan zehar euskal baserriko produktu tipiko ugari erosi ahal izango dituzte, hala nola barazkiak, frutak, gaztak, pateak eta ahatearen deribatuak, ogia, pastelak, eztia, sagardoa edo txakolina, apaindurako landareak eta urdaitegiko produktuak, besteak beste, produktu ekologikoak ahaztu gabe.
Trikitilari eta gaitariak egongo dira jai giroa animatzeko. Azokako plaza bietan, gainera, taloa, sagardoa edo bestelako produktu batzuk dastatu ahal izango dira. "Merkatu honetako produktuen kalitate eta aniztasuna pizgarri nagusiak dira bisitarientzat, eta horiei esker, Getxoko San Lorentzo Bizkaiko azoka garrantzitsuenetako bat da", nabarmendu dute antolatzaileek
Kontzertu korala
Eguna borobiltzeko, Biotz-Alai abesbatza San Lorentzoko jaiari amaiera bikaina emateaz arduratuko da. Taldeak aurten ere kontzertua emango du Muxikebarrin, 20:00etatik aurrera, euskal errepertorioko kanta ezagunak zein beste tradiziozko abestiak eskainiko dituela. Saio horretarako gonbidapenak daborduko agortu dira.