Deialdia hiru modalitatetan antolatuko da. Lehenengoa sektoreko profesionalei zuzenduta dago, pertsona juridikoak zein fisikoak izan. Bigarrenak, irabazi-asmorik gabeko kultura-elkarteen profesionalak ez diren proiektuak hartuko ditu, eta, azkenik, udal-erregistroan erregistratuta dauden irabazi-asmorik gabeko kultur elkarteek aurkeztutako proiektu soziokulturalak aurkeztu ahal izango dira. Hiru modalitateetan, getxoztarrek idatzi, diseinatu edo banatutako obra edo proiektu aurkeztu beharko dira, baita herritarrak partaide edota kolaboratzaile dituztenak ere.
Deialdia antzerki edo koreografia proposamenetara, zinema emanaldietara, musika emanaldietara, bertsolaritzara, haurrentzako obretara, umorezko ikuskizunetara, errezitaldietara edo antzekoetara irekita dago. Bi egun baino gehiago irauten ez duten lehiaketa, ziklo edo jardunaldien proposamenak ere onartuko dira. Lehentasuna izango dute aurreko urtean parte hartu ez zuten elkarte edota pertsonek.
Getxo Kulturako teknikariak arduratuko dira modalitate guztietako proposamenak hautatzeaz, irizpide hauen arabera, besteak beste: udalerriarekiko lotura, proiektuaren kalitatea eta interesa, tokiko kultur eragileen arteko lankidetza, euskararen presentzia eta erabilera eta genero-ikuspegia txertatzea. Guztira, 26 proiektu aukeratuko dira, eta Muxikebarri zentroko areto eta eremuertan, Romo Kultur Etxeko ekitaldi-aretoan, Areetako Xake plazan eta, aurten hasita lehenengo aldiz, Areetako Andres Isasi Musika Eskolako entzunaretoan erakusteko diseinatuta egongo dira. Ohikoa denez, Getxo Kulturako kanalen bidez jakinaraziko du noiz antzeztuko diren, behin zehaztuta daudenean.
Guztira, 120.000 euro bideratuko dira ekimen honetarako. Aurrekontu horretatik, 80.000 eta 40.000 euro, hurrenez hurren, partaidetzako lehenengo bi modalitateetara bideratuko dira. Hirugarren modalitatearen kasuan, Getxo Kulturak ez du diru-zuzkidurarik bideratuko; aitzitik, bere gain hartuko ditu erakustaldiari dagozkion kostuak, deialdiaren oinarrietan zehaztutakoak.
Proposamenak aurkeztu
‘Getxo eszena irekia’ri buruzko dokumentazioa dagoeneko eskura dago hemen eta proposamenak era telematikoan aurkeztu ahal izango dira (Getxoko Administrazio Elektronikoaren Bulegoaren bidez) pertsona juridikoen kasuan, eta modu presentzialean pertsona fisikoen kasuan. Ekimen horri lotutako edozein kontsulta helbide elektroniko honetara bidali ahal izango da: programazioa@getxo.eus.