Egunero egiten ditugun mugimenduakaz apurtu eta norberaren gorputzaren ulermena indartzeko klaseak eskaintzen ditu Ondarroak. Bere saioak dantza garaikidean eta luzaketa saioetan banatzen dira eta adin-tarte oso desberdinetako ikasleak ditu, 18 urtetik hasita 60 ingurura arte. Dioenez, hasieran gauzak nahiko modu zurrenean hasi zen egiten, baina ikusi zuen jendeak eguneroko zurruntasun horretatik atera gura zuela, eta bere gauzak egiteko moduak horietara moldatzen joan zen.
“Kulturan oso gutxi inbertitzen dela uste dut. Beste herrialde batzuetan gehiago eta hobeto kontsumitzen da, eta uste dut gurean hemen lanketa egin behar dugula oraindik”
"Ikasleei beti esaten diet nire klaseetara etortzeko ez dutela zertan aurretik dantzan edo beste kirolen batean aritu izan behar, zerotik hasten bainaiz, eta klaseak pertsona bakoitzari moldatzen ditudalako. Asko gustatzen zait ikustea ikasturtean zehar jendeak antzematea nola aldatzen diren beraien gorputzak; horregatik, esaten dut mugimenduan jartzen dudala ardatza. Horrez gain, imajinazioa ere asko lantzen dut, adibidez, ikasleei suge batekin edo uretan dantzatzen ari direla imajinatzeko esaten diet", kontatu du dantza-irakasleak.
Horrez gain, Enbata Espazioan bigarren adar bat ere ari da lantzen, "dantzatzea ez delako garrantzitsuena", eta bestelako arteek eta diziplinek euren eragina dutelako, hala nola argazkilaritzak edo musikak. Azaldu duenez, Algortako beste emakume batzuekaz, inguruko gazte sortzaileek elkar ezagutzeko eta hurbiltzeko gune baten sorrera abiatu du. "Inguruan sortzaileak garen emakumeon arteko sarea egiteko espazio bat sortu nahi dut", zehaztu du.
Etorkizunera begira, Enbata Espazioa hedatu nahiko lukeela dio, bere egitasmoagaz bat egiten duten pertsona gehiago sartu nahiko lituzkeelako. Horrez gain, bere dantzariaren izaerari ere eutsi gura dio, eta etorkizunean piezaren bat ere sortu nahiko lukeela iradoki du: "Barruko dantzaria ateratzea eskatzen dit nire gorputzak".