Datorren azaroaren 9ra arte zabalik egongo da aurtengo Bizilagunak bazkarietan parte hartzeko izena emateko epea. Aurten, datorren azaroaren 16an izango dira, "Etxean edo txokoan, sareak elikatzen!" lelopean. Udalerrian, Getxoko Udalak, Egizu Getxo Euskaldun elkarteak eta Getxoko Etorkinen Plataforma Federazioak sustatzen dute ekimena, Eusko Jaurlaritzaren laguntzagaz, besteak beste.
Elkarbizitza sustatze eta aniztasuna eta kultur artekotasuna ospatze aldera, hainbat kultura eta jatorritako familia parte hartzaileek (bertokoa eta beste herrialde batetik etorritakoak) otordu bat partekatuko dute mahai baten inguruan, etxeetan, txokoetan eta abarretan.
“Ekimena elikagaiak, tradizioak eta esperientziak partekatzean datza, aniztasunaren balioa indartzeko, auzokideen arteko loturak sortzeko eta, aldi berean, kulturartekotasuna ospatzeko”, gaineratu du Mihaela Jilavu Diaconescu, Kultur artekotasun eta Immigrazioko Unitateko zinegotziak.
Bazkari bakoitzean pertsona dinamizatzaile bat izango da familaikaz edo elkarbizitzako taldeakaz. Jardueretan parte hartu gura duten familiek edo dinamizatzaileek izena eman dezakete www.labur.eus/bizilagunak25 edo 622 433 085 telefono zenbakiaren bitartez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
