Bidean Erromeria 2016an sortu zen, Ainhoa Aranburu eta Kerman Santiagoren eskutik, erromeriak egiteko asmoagaz. Urte gutxiren buruan euskal jaien giroan erreferente bihurtu dira, eta gaur egun Ainhoa Aranburu (ahotsa), Jon Iglesias (gitarra), Ander Romero (gitarra), Liam O ́moilan (baxua), Aritz Landeta (trikitia), Beñat Gorostiaga (bateria) eta Asier Castillo (tronboia) dira taldeko kideak.
Erromerietan, egungo euskal musikaren kanta ezagunenak eskaintzen dituzte, berbenen espiritua euskal doinuakaz uztartuta. "Guk beraien musikaren transmisoreak gara", azaldu dute taldekideek, "eta euskaraz abesten dugu gustatzen zaigulako, ez kuota baten arabera, baizik eta gure barrutik naturaltasunez ateratzen zaigulako".
Taldearen esanetan, euskal musika oso aberatsa da, eta horregatik saiatzen dira plazaz plaza eramaten, gazteak euskarazko kulturara erakarriz. Aurtengo udan 20 kontzertu inguru eskaini dituzte Euskal Herriko herri ugaritan, eta "beti gozatzeko asmoz" jarraitzeko asmoa dutela iragarri dute.
Diotenez, saria jasotzeak "eskerrona eta errekonozimendua" dakarrela adierazi dute: "Udalaren eta gure herriko eragileen babesa jasotzea ohore handia da guretzat. Gure ibilbideari egindako aitortza gisa hartzen dugu".
Ekitaldia
Sari-emate ekitaldia azaroaren 4an izango da, Fadurako Tiki Toki zentroan, 19:00etatik aurrera. Bere aldetik, Getxoko Udalak nabarmendu du Bidean Erromeria euskararen aldeko eredua dela, eta "musika, jai-giroa eta hizkuntza batuz belaunaldi berrientzako euskal kulturaren erreferente" bihurtu direla.
Getxoko Udalak duela 16 urte jarri zuen martxan Argia Ereiten Saria, ESEP – Euskara Sustatzeko Ekintza Planaren baitan, euskararen erabilera soziala babestu, hedatu eta sustatzen duten proiektuak saritzeko asmoagaz.