Getxo Kulturaren arabera, jaialdian "ahots eta errepertorioen aniztasuna” izango da nagusi eta publikoak musika klasikoa, garaikidea, herrikoia eta erlijiosoa entzuteko aukera izango du.
Egitaraua Sonat Vox gizonezkoen abesbatzak irekiko du gaur, eguenean, eta, domekan, Balsis gazte abesbatza letoniarrak itxiko du jaialdia.
Aste-akabuko saioetako une berezietako bat zapatuan izango da. Izan ere, Getxoko Lilura abesbatzak bere 25. urteurreneko kontzertu berezia eskainiko du, Con nombre de mujer izenburupean. Saioan, Mariasun Yanguas zuzendariak gidatutako taldeak, emakumezko 40 kantari biltzen dituenak, errepertorio zabala interpretatuko du. Ibilbide luzeko talde honek hainbat estilo eta genero jorratuko ditu; besteak beste, euskal musika tradizionala, bilbainadak eta pop, folk zein klasikoko kantuen moldaketak.
Sarrerak salgai daude Getxoko Kultur Etxeko ohiko saltokietan.