Arazoa barikuan hasi zen, ur-ihesa zegoela antzeman zutenean. Udal-iturriek zehaztu dutenaren arabera, Udaltzaingoak eman zuen abisua, eta udal-brigadak lekura bertaratu ziren egun horretan bertan, arazoa ur-sare publikoa ote zen konprobatzeko. Hala, kalean zanga bat zabaldu ostean, egiaztatu zuten matxura instalazio partikularrari zegokiola. "Zapatuan egiaztatu zen matxura Ganetako komunitate pribatuan zela, 1ean, eta hala adierazi zitzaien egun horretan bertan", azaldu du Udalak.
Hodiaren titulartasunak, baina, eztabaida piztu du; izan ere, eta tokiko gobernuak pribatua dela ziurtatu du: "Ganeta kaleko 1 zenbakiko jabekideen erkidegoaren komunitate pribatuan izandako matxura da. Partikularra da, eta haiena bakarrik. Horregatik, komunitateko giltza itxita dagoenez, urik gabe daude. Konpondu egin behar dute".
Auzokideetako batek, baina, aitortu du hodia pribatua izan daitekeela, baina matxura eremu pribatutik kanpo eman dela, Ganeta plazatik kanpo hain zuzen. Hori dela eta, arazoa Udalak konpondu beharko lukeela uste du.