Lehenengo bi egunetan, abenduaren 1ean eta 2an, Lope de Vega, Kresaltzu eta Ezequiel Agirre kaleen zati batzuetan garajeetara baino ezingo da sartu eta irten. Abenduaren 3tik aurrera, lanen erritmoaren arabera itxiko da trafikoa, batez ere Kresaltzu kalean eta elkarguneetan.
Zubiaren asteburuan, abenduaren 6tik 8ra, Kresaltzu eta Lope de Vega kaleak irekita egongo dira, baina Ezequiel Agirreren noranzkoaren aldaketak indarrean jarraituko du.
Abenduaren 9an eta 10ean, ordea, Kresaltzu kalea erabat itxiko da eta ezingo da Lope de Vega eta Ezequiel Agirre arteko konexioetatik pasa. Horregaz batera, egun horietan Areetatik (Negubide) udalerrira sartzea ez da posible izango, bertara sartzeko baimena duten ibilgailuentzat izan ezik. Lan horiek amaitutakoan, Ezequiel Agirreren ohiko zirkulazio-noranzkoa berrezarriko da.
Era berean, garraio publikoak ere aldaketak izango ditu. Izan ere, Bizkaibusek Areeta eta Berango lotzen dituen linearen ibilbidea aldatuko du obrek irauten duten bitartean. Hots, autobusak ez dira Erromotik igaroko eta Negubidetik desbideratuko dira Berangorako noranzkoan. Alderantzizko bidean, Areetara joatean, ohiko ibilbidea mantenduko da.