Iñigo Urkitza Ingurumen zinegotziak azpimarratu du bi zerbitzu horiek "eredu iraunkorrago baterantz aurrera egiteko aukera" eskaintzen dutela, murrizketa, berrerabilpena eta birziklapena ardatz hartuta.
Herritarrek gero eta gehiago erabiltzen dituzte Garbigertu puntuak: egun 10 daude martxan, eta abenduan beste bat gehituko da. Guztiak 24 orduz daude zabalik, urte osoan zehar. 2024ko uztaila eta 2025eko urrian bitarteko datuen arabera, 44.805 kilo hondakin utzi dira edukiontzi horietan; besteak beste, olioak, pinturak, pilak, tresna elektronikoak edo iraungitako sendagaiak jasotzen dituzte.
Bestalde, tamaina handiko objektuen bilketa-zerbitzuak 38.400 kilo inguru bildu ditu epe berean, 631 etxebizitzatan esku hartuta. Zerbitzu hau doakoa da eta altzariak, etxetresna elektrikoak edo bigarren bizitza izan dezaketen bestelako objektuak berrerabiltzea du helburu.
Laneratzearen aldeko apustua
Emaus enpresak bi zerbitzuak kudeatzen ditu, eta gizarte-bazterkeriako egoeran edo arriskuan dauden pertsonak gizarteratzea eta laneratzea sustatzea du xede. Zerbitzu horiei lotuta, laneratzeko ibilbideetan parte hartzen duten pertsonentzako bi lanpostu daude, lan-jarduera, prestakuntza espezializatua eta gaitasun profesionalen garapena uztartzen dituztenak.