Ildo horretan, Egizu eta Bizarra Lepoan euskara elkarteetako kide diren Rozio Luces eta Mikel Barcena gurekin aritu dira gaur egungo egoeraz eta urteurrenek duten esanahiaz. Bi elkarteen ibilbideak Getxoko euskalgintzaren eta auzo-ehunaren parte dira, eta urteotan egindako lana erakusketan islatu da. Lucesen eta Barcenaren esanetan, komunitatearen aktibazioa funtsezkoa da euskarak espazio gehiago irabazteko eta herri-dinamika berriak sortzeko.
Bestalde, Zaloa Campillo Getxoko Euskara zinegotziak mezu argia zabaldu du: "Gaur, Euskararen Nazioarteko Egunean, Getxon ere ahotsa altxatu beharra dago". Campilloren arabera, euskara ez da komunikatzeko tresna hutsa, "gure etxea da, gure familia, gure kaleetan, gure eskoletan eta gure bihotzetan bizi den altxorra", eta, altxorra den neurrian, "zaindu, erabili eta ausart babestu" beharrekoa da.
Zinegotziak nabarmendu du Getxoko herritarrek euskaraz bizi nahi dutela eta hizkuntza-berdintasuna eskubide gisa ulertzen dutela. Horregatik, Udalak konpromisoa hartu du udalerriko arlo guztietan euskararen presentzia handitzen jarraitzeko. Campilloren hitzetan, "Euskara guztiona da, eta guztion artean egiten dugu indartsuago eta osasuntsuagoa: umeek jolasean, gazteek sareetan, helduek lanean, adinekoek eguneroko elkarrizketetan".