Etxebizitzen artean, 3 mugikortasun urriko pertsonentzat egokituta egongo dira. Gainerako 51ak, ostera, logela kopuruaren arabera banatuko dira: 24 etxebizitza logela bakarrekoak izango dira, 25 bi logelakoak eta 2 hiru logelakoak.
Amaia Aguirre alkateak nabarmendu du proiektu honen helburua "etxebizitza-eredu irisgarriago bat sustatzea, batez ere gazteentzat eta etxebizitza eskuratzeko zailtasun gehien dituzten herritarrentzat" dela. Gazteen egoera bereziki aipatu du: "Getxotik joan behar izan zuten gazteek itzultzeko aukera izatea nahi dugu, eta hemen bizi diren gazteek bertan geratu eta beren proiektua garatu ahal izatea". Haren esanetan, ekimenak huen emantzipazioa erraztea du xede.
Etxebizitza horiek eskuratu ahal izateko, Etxebideren erregistroan izena emanda egon behar da (alokairu modalitatean), eta gutxienez, titularretako batek Getxon erroldatuta egon beharko du urtebetez jarraian edo azken bost urteetan hirutan (2025eko abenduaren 4a erreferentzia-datatzat hartuta). Era berean, bizikidetza-unitatearen urteko diru-sarrerak 9.000 eta 45.022 euro artean egon behar dira, eta gehienez 6 kide izan daitezke. Ezinbestekoa da, halaber, inork ez izatea etxebizitzarik jabetzan, azalera-eskubidean edo usufruktuan.
Esleipenaren banaketa
- 3 etxebizitza: mugikortasun urriko pertsonentzat
- 14 etxebizitza: 36 urtetik beherako gazteentzat
- 10 etxebizitza: eskubide subjektiboa dutenentzat
- 15 etxebizitza: premia berezia dutenentzat
- 12 etxebizitza: kupo orokorra
Eskaerak www.etxebide.euskadi.eus atarian egin daitezke, edo aurrez aurre Getxoko Torrene (Algorta) eta Las Mercedes (Areeta) bulegoetan. Bilboko Kale Nagusiko bulegoan ere aurkeztu daitezke, aldez aurretik hitzordua eskatuta edo posta bidez.
Baldintzak betetzen dituztenei gutun edo posta elektroniko bidez bidaliko zaizkie Etxebideren informazioa baita jarraibide zehatzagoak ere.