“Jarduketa honetan aurreikusita dago udalerriko hainbat puntutan eremu bakoitzera egokitutako ale autoktono berriak jarriko direla, gune bakoitzera egokituta, kokaleku bakoitzeko lurzoruaren izaeraren eta lerrokaduran edo berdeguneetan duten kokapenaren arabera, besteak beste. Gainera, esku hartzen jarraitzeko borondatea dugu, udalerriko hainbat tokitan ehun bat ale autoktono landatuz, astigar arrunta esate baterako, eta kaltetutako urkiak, ibaiertzetako haltzak edo kostaldearen aurrealdeko arteak, hala nola Satistegiko beheko aldean eta Miramarren berriro jarriz”, nabarmendu du Ingurumen Unitateko zinegotzi arduradunak, Iñigo Urkitzak.
Kanpainan zehar, gutxienez 404 ale ordezkatzea aurreikusten da, udalerriko beste leku batzuetan birlandatuko direnak edo hainbat arrazoirengatik kenduko direnak: besteak beste, beren kokapenagatik larrialdietako zerbitzuak eta ibilgailuak igarotzea eragozten dutelako transplantatuko dira, edo apurtuta, kaltetuta, erorita edo osasun patologiek jota daudelako kenduko dira; horiek urte amaierara arte identifikatu dira, Urkitzak azaldu duenez. “Zuhaitzak birjartzeko arrazoiak askotarikoak izan ohi dira: denboraleak edo kontrako faktore meteorologikoak, batez ere haizea, segurtasunean eta joan-etorri askean eragina dutenak, adarrak edo zuhaitza bera erortzeko arriskuagatik; ezbeharrak bide publikoan, hala nola trafiko-talkak edo -istripuak; gaixotasunak, zahartasuna eta aleen usteltzea; edo, batzuetan, ekintza bandalikoak”.