Herritarrek erosketak lasaitasunez eta segurtasunez egin ahal izatea, eta aldi berean, merkatarien jarduna babestea da Udalak duen xede nagusia. Horretarako, denda gehienak biltzen dituzten eremuetan agenteen presentzia areagotuko da, bai oinez bai kotxez.
Lapurreta txikiak, ebasketak eta antzeko delituak saihestea da asmoa, eta Udalak nabarmendu duenez, neurri hauek prebentzioan oinarritzen dira, segurtasunaren ikuspegitik Gabonak ahalik eta normaltasun handienagaz igarotzeko.
Neurri osagarriak Gabonetan
Urtero bezala, ostalaritzako establezimenduen ixteko ordutegia luzatuko da Gabonak direla eta. Neurria abenduaren 12tik urtarrilaren 6ra arte egongo da indarrean, jaietan ostalaritza-sektorearen jarduera ekonomikoa babestu eta bultzatzea xede izanik.
Ordutegi-luzapena ostiraletan, larunbatetan eta jai-bezperetan aplikatuko da batez ere, eta lokal motaren arabera, bi ordura arteko luzapena izango dute. Gainerako egunetan ere ixteko ordutegia ohikoa baino beranduago izango da.
Horregaz batera, Itzubaltzeta/Romoko herri ikastetxeko jolastokia aparkaleku publiko gisa erabilgarri jarriko du Gabonetako hainbat egunetan. Neurriak herrigunean sortzen den ibilgailu-pilaketa arintzea eta herritarren mugikortasuna erraztea du helburu.
Aparkalekua abenduaren 24an, 25ean, 31n, urtarrilaren 1ean, 5ean eta 6an egongo da zabalik, ordutegi jakin batean.