Gabonetako giroak Algorta hartuko du

Izaro Garcia 2025eko abenduaren 15a

Azoka Algortan, artxiboko irudian.

Gabon giroak Algortako kaleak hartuko ditu datozen egunetan, Abian Kultur Elkarteak antolatutako bi ekimenekaz. Herriko plaza eta tabernak elkargune bihurtuko dira, artisautza, elkartasuna eta bertsoak ardatz.

Lehen hitzordua abenduaren 20an izango da, eguerdiko 12:00etatik aurrera, San Nikolas plazan. Urtez urte gero eta errotuago dagoen Gabonetako Herri Azokak Euskal Herriko artisau eta sortzaileak bilduko ditu, hogei bat postutan banatuta. Bertan, eskuz egindako bitxiak, arropa, kosmetika naturalak, sendabelarrak, elikagaiak eta liburuak aurkitu ahal izango dira, opariak lasai eta gertuko ekoizleen eskutik erosteko aukera emanez.

Azokagaz batera, hainbat elkartek ere parte hartuko dute; hala nola Sare, Gernika-Palestina, Harrera elkartea, AEK edo Periko Solabarria. Hauek guztiek kontsumo arduratsua sustatzea eta, aldi berean, plaza elkargune bihurtzea dute xede oraingo honetan.

Bigarren hitzordua abenduaren 30ean da. Orduan, Bertso Kateak hartuko du Algorta. Unai Mendiburu eta Amets Arzalluz bertsolariek tabernaz taberna girotuko dute arratsaldea, Triku taberna parean hasita eta Abian Kultur Elkartean amaituta. .

Beraz, animatuko zara? Zatoz euskal kultura sustatzera!

Jendartea Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun