Gabonak daborduko iritsi dira, eta Getxok familientzako hainbat plan berezi jarri ditu martxan; horien artean, Txu Txu doako trena. Ibilgailu honek Bidezabal, Algorta eta Getxolandia lotuko ditu. Zerbitzua bariku honetan, abenduaren 19an, hasiko da 11:30ean, eta urtarrilaren 6ra arte ibiliko da kalez kale, Gabonetako giroa herriko auzoetara eramanez.
Trenak Getxolandiaren ordutegi bera izango du, eguerdian eta arrastian, eta Bidezabalgo anbulatoriotik abiatuko da bai 11:30ean, bai 17:00etan. Algortako etorbidean geldialdia egin ondoren, Las Mercedes elizan jaisteko aukera eskainiko du, Evaristo Txurruka kaian jarritako noriara hurbildu gura dutenentzat. Ondoren, Areetako Geltokia plazako Getxolandiara iritsiko da. Behin hori eginda, ibilbideak alderantzizko norabidea hartuko du.
Getxoko Udalak adierazi duenez, haurrek, gazteek eta familiek Gabonetako Haur Parkera eta noriara erraz joateko pentsatuta dago; hau da, ez da tren turistiko hutsa, Gabonetako planak errazteko garraiobidea baizik. Abenduaren 25ean eta urtarrilaren 1ean ez da zerbitzurik eskainiko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
