Elkarteek planak udalerria Euskadiko uholdeek kaltetutako gune nagusien artean kokatuko lukeela salatu dute. Hauen arabera, planak 60 hektarea hormigonatzea aurreikusten du, 100 futbol-zelaik hartuko luketen azalera, Gobela eta Kandelu ibaien arroetan. Horrek ura xurgatzeko gaitasuna murriztuko luke, eta eurite handien aurrean, uholdeak izateko aukera handitu.
Aurkeztutako datuen arabera, Getxoko biztanleriaren %12 uholde-arriskuan egongo litzateke; hau da, 9.000 pertsona baino gehiago. Horietatik, mila lagun baino gehiago arrisku handieneko eremuetan bizi dira gaur egun.
Elkarteek salatu dute planak ez duela aurreikusten derrigorrezkoa den Azterketa Hidraulikoa, araudiak halakoa egitea eskatzen duen arren, batez ere Gobela ibaiaren arroaren % 25etik gorako eremuan hirigintzako esku-hartzeak planteatzen direnean.
Auzokideen esanetan, plan berriak ez du laguntzen uholde-arriskua murrizten, eta segurtasunari lotutako beharrak bigarren mailan uzten ditu. Horregatik, bide judiziala hartzea erabaki dute, planaren legezkotasuna azter dadin eta herritarren segurtasuna kontuan har dadin.