ATFAL Sahararen aldeko Getxoko Elkarteak antolatutako programa da eta, Getxoko Udalaren laguntzagaz, 8 eta 9 urte bitarteko haur sahararrei zuzenduta dago.
Uztaila eta abuztuan zehar, Aljeriako Tindoufeko errefuxiatuen kanpamenduetan bizi diren haurrek aukera izango dute bertako muturreko baldintzetatik aldentzeko. Izan ere, udan tenperaturak 55 gradura irits daitezke eremu horretan. Programaren bidez, haurrek atseden hartzeaz gain, osasun-azterketa orokorrak, oftalmologikoak eta hortzetakoak egiteko aukera ere izaten dute, baita bestelako esperientzia kultural eta sozialak bizitzekoa ere.
Getxoko Udalak azpimarratu du programagaz lotutako hainbat gastu finantzatuko dituela; joan-etorriko bidaiak eta antolatzen diren jarduerak, besteak beste.
Izen-ematea ATFAL elkartearen bidez edo Getxoko Udaleko Lankidetza Sailean egin ahal izango da.
ELKARTASUN KEINUAK
Bestalde, Urtarrilaren 30era arte zabalik dago Euskal Karabana Solidarioaren baitan elikagai eta oinarrizko produktu higienikoen bilketa, Getxoko hainbat ikastetxe eta kiroldegitan, Tindoufeko kanpamenduetan dagoen elikadura-krisiari aurre egiteko asmoz.