Erasoa aurreko zapatuan, urtarrilaren 31an, jazo zen, 13:35ak inguruan, Algortan. Lekukoek Getxoko Udaltzaingoari deitu zioten gizon bat emakume bati arma zuriz erasotzen ari zela ohartarazteko, eta polizia-patruila bertaratu zenean, emakumea larri zaurituta aurkitu zuten. Gizonezkoak berak aitortu zuen egindakoa, eta agenteek erabilitako labana inguruan aurkitu zuten.
Atxilotuaren aurkako diligentzietan, Getxoko Emakumearen aurkako Indarkeriaren Epaitegiaren aurrean deklaratu ostean, epaileak espetxeratzea agindu du. Udalak, bere aldetik, indarkeria matxistaren aurkako jarduketa- eta koordinazio-protokoloa martxan jarri du, eta Bozeramaileen Batzarra deitu du eguaztenerako.
Eraso horren aurrean, Algortako Mugimendu Feministak mobilizaziora deitu du, "erasorik ez erantzunik gabe" lelopean. Elkarretaratzea bihar, otsailaren 4an, 19:30ean izango da Telletxe plazan, indarkeria matxistaren aurrean gaitzespena adierazteko eta biktimari babesa erakusteko.