Banakako sari nagusietan, errugbiak eta belar hockeyak izan zuten protagonismo berezia. Senior mailan, Maider Aresti eta Naroa Azpitarte (Getxo Rugby Taldea) saritu zituzten, Espainiako selekzioagaz Europako titulua irabazi eta Munduko Kopan lehiatzeagatik. Gizonezkoetan, Juan Prado eta Juan Vilallonga (Jolaseta) omendu zituzten, 21 urtez azpiko Munduko Txapelketan txapeldunorde izateagatik. Promesen artean, June Larrañagak eta Telmo Fisherrek jaso zuten aitortza, biek ere Europako txapelketetan lortutako garaipenekaz etorkizun oparoa iragarriz.
Taldeek ere euren tokia izan zuten oholtzan. Getxo Bolei Kirol Taldeko emakumezkoek jauzi historikoa eman dute Espainiako lehen maila igota. Era berean, Arenas Clubek ere gora egin du mailaz. Gazteen kategorietan, Jolasetako kadete mailako neskek eta Getxo Igeriketa Waterpolo Bolue Elkarteko haur mutilek jaso zuten saria.
Ekitaldian, Amaia Aguirre alkateak kirola marka eta sailkapenen kontua bakarrik ez dela azpimarratu zuen; hau da, ohitura osasungarria, hezkuntza tresna eta komunitatea josteko bidea dela. Ildo horretan, hainbat sari berezi ere banatu zituzten, kirol inklusiboa, berdintasuna, babesletza eta euskararen erabilera sustatzen duten pertsona eta erakundeen lana aitortzeko.