Proiektuak Portu Zaharreko eta Arrigunagako ponpaketetan esku hartzea aurreikusten du, baita Kakalekuko edo Tunelbekoa galerian ere. Azpiegitura horiek inguruko auzoetako hondakin-urak bildu eta Galindoko araztegira bideratzen dituzte, Gobelako kolektoretik barrena. Euri-jasa handiak daudenean, aldiz, gainezkatzeak gerta daitezke; hori ekiditeko, neurri gehigarriak ezarriko dituzte hondakin solido flotatzaileak atxiki eta itsasadarrera iritsi aurretik kontrolatzeko.
Batetik, Portu Zaharreko ponpaketan sare fineko hiru galbahe automatiko instalatuko dituzte, eta Arrigunagan beste bi, 6 milimetrotik gorako hondakinak atxikitzeko. Bestetik, Kakalekuko galerako bulkada-hodiak berrituko dituzte, aireztapena hobetzeko eta korrosioa saihesteko.
Obrak Getxoko Udalagaz koordinatuta egingo dituztela iragarri dute, eta daborduko informazio-bilerak egin dute Portu Zaharreko Auzokideen Elkarteagaz eta udal-korporazioagaz. Hala, iragarri dute lanek aldi baterako eraginak izango dituztela, izan ere, Portu Zaharrean 45 aparkaleku kenduko dituzte behin-behinean, oinezkoentzako ibilbide alternatiboak egokituko dituzte, eta zenbait espaloiren okupazioa aurreikusi dute Kakalekun eta Arrigunagan.