Alderdiak gogorarazi du bi hamarkadatan irizpide partekatu bat nagusitu dela arlo honetan, Arartekoak eta tokian tokiko eragile sozialek gidatuta. Jaurlaritzaren jardunari lotuta, kontraesan bat ere nabarmendu du: "Duela urtebete, Bingen Zupiria Segurtasun sailburuak berak orain aldarrikatzen duenaren kontrakoa defendatzen zuen".
EH Bilduren ustez, atxilotuen jatorria ezagutarazteak ez du "erabilgarritasun praktikorik": "Oso gutxitan eskaintzen du delituari buruzko informazio garrantzitsua, eta biktimari ere ez dio laguntzen". Aitzitik, ohartarazi du jatorria azpimarratzeak estereotipoak indartu eta talde jakin batzuk susmagarri bihurtzeko joera normalizatzen duela, eta "immigrazioa delinkuentziarekin lotzeko" arriskua handitzen duela.
Urtarrilaren 29ko eztabaida
Urtarrilaren 29an, gaia Bilboko Udaleko osoko bilkurara iritsi zen, eta hiru bide geratu ziren mahai gainean: PPk Udaltzaingoari atxilotuen jatorria publikatzeko eskatu zion; Elkarrekin Podemosek kontrakoa defendatu zuen; eta gobernu-taldeak, bi proposamenen aurrean, zuzenketa bidez segurtasun politika indartu eta bizikidetza sendotzea proposatu zuen. Hirugarren aukera hori atera zen aurrera, gobernu-taldeko alderdiek eta EH Bilduk babestuta.
Eztabaidan, udal-gobernuak berak jatorria baino, delituaren errepikapena zela arazoa azpimarratu zuen. Horregatik, EH Bilduk dio jarrera-aldaketa ez dela datuetan oinarritu, eta "ebidentzia teknikorik’" ez dela mahai gainean jarri.