Prozesu honetan Getxon erroldatutako 16 urtetik gorako pertsonek zein udalerriko elkarte eta erakundeek har dezakete parte, betiere proposamenak zehatzak, ekonomikoki egingarriak eta Udalaren eskumenekoak badira. Online bideaz gain, ekarpenak aurrez aurre aurkezteko aukera ere egongo da etxeetara bidaliko dituzten paperezko formularioen bidez, Areetako, Algortako eta Bidezabaleko metro geltokietan jarritako postontzietan utzita. Gainera, informazio-moduluak ere kokatuko dituzte hainbat gune estrategikotan, hala nola Algortako Telletxe plazan, Zubileta parkean, Bidezabalen, Areetan eta Fadurako kiroldegian, herritarrei laguntza emateko.
Gorka Mostajo Herritarren Partaidetzarako zinegotziak azaldu duenez, prozesu honen helburu nagusia getxoztarren ekarpenak modu arin eta errazean biltzea da, horretarako Zeugaz online plataforma lehenetsiko dute. Tresna horrek identifikazio-marka berria estreinatu du aurten, elkargunea eta ideien bidegurutzea irudikatzen duen X itxurako ikono bategaz, parte-hartze digitala azkarragoa eta gardenagoa dela ziurtatzeko.
Era berean, zalantzak argitzeko asmoagaz, Udalak hiru hitzaldi informatibo antolatu ditu datozen egunetarako: martxoaren 9an Bentan izango da saioa, eta martxoaren 11n RKEn zein Getxo Elkartegian. Behin ekarpenak jasotzeko epea amaituta, Udaleko zerbitzu teknikoek proposamenen bideragarritasuna aztertuko dute, eta baldintzak betetzen dituzten proiektuak bigarren fase batera igaroko dira herritarrek lehenetsi ditzaten. Informazio guztia eta galderak bidaltzeko aukera Zeugaz plataforman eta partaidetza@getxo.eus posta elektronikoan dago eskuragarri.