Elkartearen arabera, Larrañazubi gune bereziki zaurgarria da ibaiaren kota altuagatik, eta "abandonu egoeran" dagoela salatu dute. Gainera, Gobela ibaiaren alerta-mailen aldaketa ere kritikatu dute; izan ere, gaur egungo sistema berriagaz, maila horia ezartzen denerako auzoa ia urpean dagoela adierazi dute, alerta laranjara iritsi beharrik gabe. Egoera paradoxiko honek prebentzio-marjina guztiak deuseztatzen dituela diote auzokideek.
Segurtasuna bermatzeko asmoz, elkarteak premiazko jarduerak exekutatzeko eskatu du, lehenagotik URAri iradokitako "jarduera txikiak" barne, puntu kritikoetan arriskua murrizteko. Bien bitartean, auzokideek euren kezkaren berri eman dute sare sozialetan, ibaiaren gainezkatzea eta euriteen magnitudea erakusten duten bideoak zabalduz, agintariei konpromiso eraginkor bat eskatzen dieten bitartean.
Fadurako futbol-zelaia ere uren azpian geratu zen aste-akabuan, Gobela ibaiak bertan ere egin baitzuen gainezka. Belar naturaleko futbol-zelai horretan Arenasek jokatzen du, besteak beste, eta, duela gutxi hori berritzeko lanaka burutu badituzte ere, zapatuan ibaiaren urek gainezka egin zuten horretan ere.