Jaialdiak Getxon izango du lehen geltokia: martxoaren 18an, Fadurako Tiki Toki zentroan. Egun horretan, surfaren industriari zuzendutako jardunaldi profesionala egingo dute. Hurrengo egunean, martxoaren 19an, Muxikebarrin egingo dute Inaugurazio Gala Nagusia, eta bertan proiektatuko dituzte Igor Bellido donostiarraren lanak: Ride of a Lifetime, Hono, Violeta eta Ikigai; Bellido izan zen, gainera, aurreko edizioko irabazle nagusia.
Jaialdiak Bilbon jarraituko, bertan izango baita musika protagonista izango duen berritasun handienetako bat. Hala, martxoaren 20an, 18:00etatik 00:00etara, Bilbao Arenak pop-rock eta indie egungoaren gau berezia hartuko du: Morgan madrildar rock taldeak, Carlangas musikari eta ekoizle galiziarrak eta Maren bilbotar indie promesak joko dute, "prezio herrikoietan" antolatutako kontzertuetan.
Zinemari dagokionez, jaialdian 56 film proiektatuko dituzte guztira, 44 herrialdetan grabatuak eta 23 herrialdetako zuzendarien lanakaz, proiekzioak Bilbao Arena eta Golem-Alhondiga artean eskainiko dituzte. Antolatzaileen esanetan, nabarmena da emakume zuzendarien eta protagonisten presentzia, baita gaurkotasuneko gaiak lantzen dituzten lanen kopurua ere. Besteak beste, programazioan izango dira Gazako Zerrendan surf egiten duen talde bati buruzko Gaza Surf Club, Mundakako olatuaren saio berezi bati buruzko Best of Mundaka, eta Wave of my lifetime, Natxo González protagonista duena. Horiez gain, Kikiribu (Kuba, Kepa Acero eta Susana Zayas), eta Laetitia, Leticia Canales surflari profesional sopeloztarrari buruzko dokumentala, ere izango dira jaialdian.
Networking-ri dagokionez, ekologia, tailerrak, hitzaldiak, lehiaketak, tokiko artea eta bestelako sorpresa batzuk ere iragarri dituzte, jaialdiak Getxon zein Bilbon izango dituen gune eta jardueren osagarri.