Euskarazko jarduera osagarrien kasuan, proiektuak aurkezteko azken eguna maiatzaren 30a izango da. Kultur arloko laguntzetan, berriz, eskaerak maiatzaren 4ra arte egin ahal izango dira, Olentzeroren inguruko jarduerek epe luzeagoa izango duten arren; hau da, urriaren 20ra arte .
Dirulaguntzen bidez, Udalak eguneroko jardueretan euskararen presentzia handitu gura du; batez ere haur eta gazteen artean. Horrela, euskaraz egiten diren ohiko aisialdi-jarduerek laguntza jasoko dute, baina baita antzerkia edo bertsolaritza bezalako ekimenek ere. Era berean, barnetegiak eta hizkuntza-murgiltze jarduerak ere diruz lagunduko dira, eta Euskararen Eguna edo euskal astea bezalako ekitaldiak antolatzeko baliabideak ere egongo dira.
Bestalde, kultur arloko laguntzek tokiko jarduera zehatzak estaliko dituzte, hala nola auzoetako Olentzero ospakizunak, San Juan jaiak edo Korrikaren inguruko ekimenak. Horrez gain, gazteei zuzendutako programak ere finantzatuko dira, bai Getxoko kultura Euskal Herriko beste gazteei erakusteko, bai udalerriko gazteek euskal kultura gertutik ezagutzeko.