Mihaela Jilavu zinegotziak azaldu duenez, kostuak kentzeak "aurrerapauso erabakigarria" suposatzen du udako oporraldian hezkuntza eta aisialdi aukeretara sarbide ekitatiboa bermatzeko. Ildo horretan, neurriaren helburu nagusia aukera-berdintasuna indartzea dela azpimarratu du, arrazoi ekonomikoengatik familia bakar bat ere kanpoan gera ez dadin.
Udako udalekuen programa uztailean zehar garatuko da hiru ikastetxetan: Geroa ikastolan, Juan Bautista Zabalan eta Romo ikastetxean. Bi txanda egongo dira, bakoitza bi astekoa: ekainaren 29tik uztailaren 10era eta uztailaren 13tik 24ra. Txanda bakoitzean 4 txango egingo dira, martitzen eta eguenetan.
Familia eta lan-kontziliazioa errazteko asmoz, aurten ordutegi malgutasuna handitu da sarbidean. Igerileku edo kirol guneetara joateko ordutegi zehatzak izateaz gain, sarrerak 08:00etatik 09:00etara egin ahal izango dira, tarteko ordutegiakaz Irteera orduak, berriz, 14:00etan edo 17:00etan finkatu dituzte, jantoki zerbitzua aukeratzen duten kasuetan.
Izen-ematea
Plazak eskuratzeko eskaerak maiatzaren 4tik 17ra bitartean aurkeztu ahal izango dira, Getxoko Udalaren egoitza elektronikoaren bidez edo Herritarrak Arreta Zerbitzuko (HAZ) bulegoetan. Onartuen behin-behineko zerrenda maiatzaren 22an argitaratuko dute.