Getxo Itsas Hubek, Getxo Sormen Huben bidetik, udalerriko mikroenpresen lehiakortasuna eta espezializazio adimenduna bultzatzen ditu. Deialdi berri honen bidez, hautatutako proiektuek zentroaren seigarren urtetik bederatzigarrenera bitarteko jarduera bermatuko dute, ekimenaren heldutasun maila erakutsiz.
Aukeratutako proiektuek Getxoko enpresa-sarearen aberastasuna eta maila tekniko altua islatzen dutela nabarmedu dute Udaleko arduradunek, eta lau arlo nagusitan banatzen dira adjudikaziodunak: turismo nautikoa eta esperientziak, teknologia eta digitalizazioa, zerbitzu aurreratuak eta aholkularitza, eta itsas kultura zein ondarea.
Juanma Gonzalez Ekonomia Sustapeneko zinegotziaren hitzetan, "helburua aukera guneak sendotzen jarraitzea da, Getxon inpaktu positiboa sortzeko". Hala, zentroak lanerako gune modernoak eskaintzeaz gain, internet zerbitzua, bilera-gelak, prestakuntza programak eta Getxolanen aholkularitza teknikoa jartzen ditu ekintzaileen eskura, sinergiak eta elkarlana sustatzeko ingurune batean.
Zentroa profesional berriz betetzen ari den arren, oraindino badago lekua ideia berrientzat. Gaur egun, lau postu finko eta sei postu malgu daude libre, eta interesa duten ekintzaileek Getxoko Udalaren egoitza elektronikoaren bidez egin dezakete eskaera, deialdiak zabalik jarraituko baitu lekuak agortu arte. Azpiegitura honek Getxoren itsas-izaerari lotutako talentua garatzeko eta udalerriko ekonomia dibertsifikatzeko tresna giltzarria izateko helburua du.