Bizkaiko I. Erreskate Teknikoari buruzko Jardunaldia izango da, eta soka bidezko erreskateetan eta altuerako maniobretan adituak diren profesionalek parte hartuko dute. Bi egunez, Zubi Eskegiaren inguruan eta itsasadarraren bi ertzetan, erreskate-ariketa teknikoak eta jarduera operatiboak egingo dituzte.
Ekimen aitzindaria da Euskadin, eta antolatzaileen arabera, Bizkaia Europan hiri-agertoki berezietan erreskate teknikoari buruzko topaketak egiten dituzten lurraldeen artean kokatuko du. Jardunaldirik ikusgarriena zapatuan izango da, 08:00etatik 18:00etara.
Jardunaldia Euskadiko Soka Erreskate Teknikoen Sorosle Elkarteak antolatu du, Bizkaiko Foru Aldundiko Prebentzio, Suhiltzaile eta Salbamendu Zerbitzuaren laguntzagaz. Horrez gain, Getxoko eta Portugaleteko udalen eta Bizkaia Zubiaren babes instituzional eta logistikoa izango du.
Ariketa praktikoez gain, ezagutza teknikoa trukatzeko, prestakuntza espezializatua lantzeko eta larrialdi-zerbitzuek egiten duten lana herritarrei hurbiltzeko jarduerak ere egingo dituzte. Horrela, koordinazioak, berrikuntzak eta segurtasunak erreskate konplexuetan duten garrantzia nabarmendu gura dute.
Antolatzaileek azpimarratu dute herritarrek aukera izango dutela erreskate-taldeen lana gertutik ezagutzeko, eta Bizkaia zubiaren ingurua larrialdi-prozedura aurreratuen praktikarako eta dibulgaziorako gune berezi bihurtuko dela.