Kemen Goitiandiak zuzendutako jokalariak partida guztiak irabazita heldu ziren azken hitzordura, baina finala ez zen batere erraza izan. Alcalák lehen zati oso serioa egin zuen, eta 3-13 jarri zen aurretik markagailuan. Getxori kosta egin zitzaion partidaren erritmoa hartzea, eta une batzuetan madrildarrek ezustekoa emateko aukera izan zuten.
Hala ere, etxekoek ez zuten amore eman. Lehen zatiaren amaieran, Alcalako bi kanporaketa tenporal ia jarraian aprobetxatu zituzten aldea murrizteko, eta atsedenaldira 10-13koagaz heldu ziren. Hortik aurrera, partida erabat aldatu zen.
Aldageletatik bueltan, Getxok aurrerapausoa eman zuen. Marlo Weichek bigarren entsegua egin zuen, eta talde hori-beltza lehen aldiz jarri zen aurretik finalean. Markagailua alde zuela, Getxok lasaiago jokatu zuen, defentsan sendoago agertu zen eta Alcalaren erreakzio saiakerak geldiarazten jakin zuen.
Azken unean lehertu zen poza Faduran. Alejo Sotillok azken jokaldian entsegu erabakigarria egin zuen, eta Enrique Tobiok transformazioa gauzatu zuen, 22-13koa behin betiko ezarriz. Azken txistuagaz batera, zaleek eta jokalariek denboraldi osoan bilatutako igoera ospatu zuten.
Lorpenak balio berezia du, Getxok 24 partida jokatu eta 24ak irabazi dituelako. Lehen fasean nagusi izan zen, igoera multzoan ere ez zuen aurkaririk izan, eta play-offean erakutsi du denboraldi osoan zehar eraikitako sendotasuna ez zela kasualitatea.
Datorren denboraldian, gainera, Bizkaiak bi talde izango ditu DH Elite mailan: Getxo Rugby eta Gernika RT. Gernikarrak maila gorenera igotzeko ateetan geratu ziren, Pozueloren aurkako finala galdu ondoren, baina zilarrezko kategorian jarraituko dute.
Getxorentzat, igoera hau denboraldi perfektu baten saria da, Fadurako zaleakaz partekatutako poza eta klubaren historiarako beste kapitulu handi bat.