Getxon, Udalak gehienez 300 euroko laguntza emango die gidabaimenaren azterketa teorikoa euskaraz egiten duten gazteei, betiere kanpainagaz bat egin duten udalerriko bost autoeskoletako batean prestatzen badira.
Aurten, gainera, pizgarri gehiago ere izango dira. Euskadiko Autoeskolen Federazioak, Gidatu euskaraz kanpainaren barruan, bi ziklomotor elektriko zozkatuko ditu abenduaren 3ra arte azterketa teorikoa euskaraz egiten duten gazteen artean. Horrez gain, Getxoko Udalak gasolina erosteko 100 euroko hiru txartel zozkatuko ditu, ohi bezala.
Aurreko edizioko saridunek ere bat egin dute kanpainaren mezuagaz. Joseba Arriolak azterketa euskaraz egitea gomendatu du, bere ama-hizkuntza delako eta Udalaren laguntza jasotzeko aukera ematen duelako. Paula Manerok, berriz, euskaraz bizitzen jarraitzeko aukera polita dela nabarmendu du; eta Irati Korralek, motorreko baimena euskaraz atera ondoren, kanpaina euskara sustatzeko tresna egokia dela azpimarratu du.
Informazio gehiago www.gidabaimenaeuskaraz.eus webgunean jaso daiteke.