Getxoko eta Bilboko bi lagun atxilotu dituzte, Libanoko Hezbola taldeagaz ustez lotura izatea egotzita

Ander Zarraga 2026ko ekainaren 17a
Deskargatu Info Ahotsak :
Español English Français Català Galego

Bart arratsaldean, hainbat herritar hurbildu ziren Asier Herranz atxilotuetako baten etxera, elkartasuna adieraztera; Ertzaintzak dispositibo zabala ezarri zuen horien aurka.

Espainiako Polizia Nazionalak bi lagun atxilotu zituen atzo, ekainaren 16an, Getxon eta Bilbon, Hezbola erakundeagaz eta terrorismoagaz lotutako ustezko jarduerak ikertzen ari den operazio baten barruan. Atxilotuetako bat Asier Herranz getxoztarra da, Iranegaz Bat kolektiboak jakinarazi duenez. Auzitegi Nazionalak zuzendu du operazioa, eta auzia instrukzio-fasean eta sekretupean dago oraindino.

Polizia-iturrien arabera, bi atxilotuak Hezbolaren eta Palestinako hainbat talde armaturen edukiak zabaltzen zituen Telegram kanal baten kudeaketagaz lotzen dituzte. Ikerketa duela hilabete batzuk hasi zen, Norbegian AEBetako enbaxadaren aurka egindako lehergailu bidezko eraso baten harira atxilotutako pertsona baten telefonoan Bizkaian atxilotutakoetako baten kontaktua aurkitu ostean. Epaileak lehen une batean etxebizitzak miatzeko eskaera baztertu zuen, aurkeztutako txostenak "hipotesiak eta suposizioak" zituela iritzita; geroago, ordea, Auzitegi Nazionaleko Zigor Salak erabakia baliogabetu eta miaketak baimendu zituen.

Atxilotuetako bat Asier Herranz algortarra izan zen. Atxiloketaren berria hedatu zenean, ehunka pertsona hurbildu ziren bere etxe ingurura, Espainiako Polizia Nazionalak bere etxea miatzen zuen bitartean. Operazioak lau ordu inguru iraun zituen, eta bertaratutako polizia-dispositibo zabala han bildutako herritarren aurka oldartu zen.

Iranekin Bat plataformak eta Samidoun preso palestinarrei babesa emateko sareak salaketak ukatu dituzte, eta atxilotuen jarduna Palestinan, Libanon eta Iranen gertatzen ari denari buruzko informazioa zabaltzera mugatu dela defendatu dute. Bi erakundeen esanetan, auziak elkartasun internazionalista eta adierazpen askatasuna kriminalizatzea du helburu. Halaber, polizia-ikerketan jasotako beste hainbat akusazio ere gezurtzat jo dituzte, tartean Espainiako Vueltako protesta-ekintzakaz edo ETAgaz lotzen dituztenak. Operazioa sekretupean dago, eta atxilotuei errugabetasun-presuntzioa dagokie.

Atxilotuak Madrilera eramatea aurreikusten dutela jakinarazi dute haien aldeko eragileek. Egoeraren berri eman eta erantzun-neurriak azaltzeko, prentsaurrekoa deitu dute barikurako, ekainaren 19rako, 17:00etan, Bilboko Burtsa eraikinean.

Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun