Egitaraua 18:00etan hasiko da, umeentzako aurpegia margotzeko tailerragaz. Ondoren, disko festa egingo dute, baita Boliviako eta Filipinetako dantzak ere. Txokolate-jana eta munduko postreak ere izango dira.
20:30ean bertso saioa izango da, eta, amaitzeko, 21:00ak aldera, konjurua, Urdiaingo San Juan Kantaita eta suaren inguruko dantzak egingo dituzte. San Juan gauaren beste ohiko ospakizun batzuk ere izango dira Getxon: Itxas Argia elkartearena Malakaten, eta Zubilletakoa, auzoko jaien egitarauaren barruan.
Segurtasuna eta prebentzioa
Getxoko Udaltzaingoak baimenik gabeko suak zaindu eta zigortuko ditu ekainaren 23ko arrasti-gauean. Era berean, baimendutako suen erretze kontrolatua gainbegiratuko du, istripuak saihesteko.
Udaltzaingoak, Ertzaintzagaz elkarlanean, prebentzio-zerbitzua jarriko du martxan hondartzetatik gertu dauden eremuetan, eta presentzia handituko du ospakizun-guneetan, istiluak eta herritarrentzako eragozpenak saihesteko. Adingabeei alkohola konfiskatzeko neurriak ere indartuko dituzte, eta debekatutako lekuetan kontsumitzea eragotziko dute.
Udalak gomendatu du hondartzara baliozko objekturik edo sakelako telefonorik ez eramatea; eta eramanez gero, une oro kontrolpean edukitzea. Halaber, udal Babes Zibilak Artatzako Suhiltzaileen Baseari jakinarazi dio Getxon suagaz baimendutako ekitaldiak egingo direla.