Fadurako igerileku olinpikoan itotze-zantzuak zituen adingabe bat erreskatatu behar izan zuten domeka arrastian. Sorosleek berehala esku hartu zuten neskatoa uretatik ateratzeko, eta lehen suspertze-lanak egin zizkioten anbulantzia iritsi bitartean. Ondoren, ospitalera eraman zuten.
Getxo Kirolakek gaur bertan jakinarazi duenez, adingabeak gaua ospitalean eman du prebentzioz, baina bere osasunak hobera egin du eta bilakaera ona izan du.
Gertatutakoaren harira, Getxo Kirolakek gogorarazi du adingabeek ezinbestekoa dutela heldu baten zaintza uretan daudenean, bereziki igerilekuetan jende gehien biltzen den orduetan. Erakundearen arabera, neurri horrek umeen segurtasuna bermatzen laguntzen du, eta, aldi berean, sorosleen lana errazten du larrialdi egoeretan.