Gobelaurre kaleko zirkulazioak aldaketak izango ditu uztailaren 8tik aurrera, Leioako Udalak Amaia etorbidean ur-ihes bat konpontzeko egingo dituen lanen ondorioz. Obrak Leioako udalerrian egingo badira ere, trafikoa eten beharko dute Gobelaurre kaleko 17. zenbakitik aurrera, Putzegileko biribilgunera eta Santa Ana ingurura doazen ibilgailuentzat.
Getxoko eta Leioako udalek jakinarazi dutenez, lanek iraun bitartean eremua eta ordezko ibilbideak behar bezala seinaleztatuko dituzte, segurtasuna bermatzeko eta mugikortasuna errazteko. Oraingoz, ordea, ez dute zehaztu obrek zenbat iraungo duten; matxuraren garrantziaren eta hura konpontzeko beharrezko lanen araberakoa izango da iraupena. Zirkulazioa ohiko egoerara itzultzen denean, herritarrei jakinaraziko dietela ere aurreratu dute.
Bien bitartean, Getxoko Udalak gomendatu die gidariei behin-behineko seinaleei eta desbideratzeei arreta berezia jartzea, eta, ahal den neurrian, Santa Ana aldera joateko ordezko bideak erabiltzea.