Itsasargia gaur egungo kokalekutik lekualdatzen ari dira. Orain arte etxebizitza bateko lurzatian egon da, itsaslabarretik urrunago, baina aurrerantzean itsasotik hurbilago egongo da, gaur egun laino-sirena dagoen 3.540 metro koadroko lursailean. Bilboko Portu Agintaritzaren arabera, kokaleku berriak nabigaziorako seinalearen funtzionamendua hobetuko du.
Ia 29 metro koadro izango dituen eraikin berriak teknologia eguneratua izango du, baina itsasargiaren ondare historikoaren zati bat ere mantenduko du. Izan ere, optika, linterna, beiratea, kapitela eta kupula berrerabili dituzte eraikin berrian, itsasargiaren nortasuna gal ez dadin.
Obra hauek, gainera, beste helburu bati ere bidea zabalduko diote. Itsasargi berria martxan jartzen denean, gaur egungo instalazioa dagoen lursaila desjabetu ahal izango da, eta Getxoko Udalak eremua erosteko prozesuari ekingo dio. Horretarako, 1,2 milioi euro inguruko inbertsioa egitea aurreikusi du.
Udalaren asmoa hiru hamarkada baino gehiagoz erabilerarik gabe egon den gunea berreskuratzea eta herritarren eskura jartzea da. Horretarako, egungo itsasargia eta haren inguruko eraikinak zaharberritu gura dituzte, ondare-balioa eta paisaia errespetatuz, eta aisialdirako zein paseorako espazio publiko bihurtu.