Jaialdiak badu urtero errepikatzen den magia berezi bat: ez da dantza ikuskizun huts bat; herri bakoitzak bere nortasuna, historia eta bizimodua azaltzeko duen modua da. Urrats bakoitzaren, jantzi bakoitzaren eta doinu bakoitzaren atzean belaunaldiz belaunaldi transmititutako ondarea dago, eta horixe da jaialdi hau berezi egiten duena.
Aurten, Itxartu Taldeak emango dio hasiera uztailaren 18an. Getxoko taldeak euskal dantza tradizionalaren aberastasuna eta indarra erakutsiko ditu, urteetan zehar zaindu eta belaunaldiz belaunaldi transmititu den ondarea erakutsiz.
Hurrengo egunean, ikusleek milaka kilometrora egingo dute jauzi. Inetnon Gefpa'go taldeak Guam uhartetik ekarriko ditu Ozeaniako dantzak eta ohiturak. Chamorro herriaren kultura bizirik mantentzea du helburu, eta bere emanaldietan erritualak, historia eta identitatea uztartzen ditu.
Jaialdiari Ngwao Letshwao konpainiak amaiera emango dio, Botswanatik etorrita. Afrikako herrialde horretako dantza tradizionalak, erritmo biziak eta ahots-kantuak izango dira protagonista, herriaren historia musikaren eta mugimenduaren bidez partekatuz.
Azken batean, Getxoko Nazioarteko Folklore Jaialdia kulturak elkar ezagutzeko gonbidapen bezala uler daiteke. Garai honetan mundua pantaila baten bidez ezagutzea ohikoa denean, badago zerbait berezia beste herrialde bateko kultura zuzenean ikusteak, entzuteak eta sentitzeak. Muxikebarrik kultura ezberdinak batuko ditu, eta folkloreak erakutsiko du hizkuntza unibertsala ere badela.
Uztailak 18, zapatua
- 20:00 Itxartu Taldea. Euskal dantzen ikuskizuna.
Uztailak 19, domeka
- 20:00 Inetnon Gefpa'go. Guam uhartetik ekarritako dantzak eta ohiturak
Uztailak 20, astelehena
- 20:00 Ngwao Letshwao. Botswanako kultura ezagutzeko aukera paregabea!