HAPO berriak datozen urteetako hirigintza-eredua zehaztuko du, eta etxebizitzaren, jarduera ekonomikoaren, mugikortasunaren, ekipamendu publikoen eta naturaguneen antolaketari lotutako erabaki nagusiak jasoko ditu. Planaren oinarrian, gainera, udalerriaren egoeraren diagnostiko zabala egin da, ingurumenari, demografiari, etxebizitza-parkeari eta azpiegiturei buruzko datuak aztertuta, etorkizuneko garapena modu orekatuan planifikatzeko.
Dokumentuak, halaber, Getxoko ingurumen-balioak babestearen garrantzia azpimarratzen du. Besteak beste, Punta Galea-Barrika eremua, Gorrondatxeko ingurunea eta udalerriko interes bereziko habitatak kontuan hartzen ditu, hirigintza-garapena eta natura-ondarea uztartzea helburu hartuta.
Udalak herritarrei planaren edukia ezagutzeko gonbita egin die. Dokumentazioa dagoeneko udalaren webgunean dago eskuragarri, eta bertan HAPOaren testua, hirigintza-araudia eta gainerako agiriak kontsultatu eta deskargatu ahal izango dira.