Udalak 100.000 euroko hasierako poltsa prestatu du laguntzetarako, eta behar izanez gero beste 50.000 eurogaz handitu ahal izango du. Etxebizitza bakoitzeko 6.000 euro emango dituzte, ordainketa bakarrean.
Neurriaren atzean Getxoko alokairuaren egoera dago. Gaur egun, 80 etxebizitza inguru baino ez daude Bizigune programan, eta, aldi berean, Etxebiden izena emanda dauden 5.524 lagunek alokairuko etxebizitza eskatu dute udalerrian. Udalaren arabera, jabeek Biziguneren bidez jaso dezaketen errenta merkatu librekoa baino txikiagoa izateak etxebizitzak programara erakartzea zailtzen du. 6.000 euroko laguntzagaz alde hori neurri batean konpentsatu gura dute.
Nork eskatu dezake?
Laguntza Getxon etxebizitza bat duten pertsona fisikoei zuzenduta dago. Horretarako, etxebizitzak udalerrian egon beharko du eta 2026ko urtarrilaren 1etik azaroaren 30era bitartean Bizigune programan sartu beharko da.
Eskaerak azaroaren 30era arte aurkeztu ahal izango dira, bai Internet bidez, Udalaren Administrazio Elektronikoaren Bulegoan, bai aurrez aurre Etxebizitza eta Ondare Sailean, Los Fueros kaleko 6. zenbakiko lehen solairuan. Informazio gehiago behar dutenek 94 466 00 44/45 telefonoetara deitu edo ondarea@getxo.eus helbidera idatzi dezakete.