Ekolur Bizkaiko Nekazaritza Ekologikoaren Elkarteak antolatu du azoka, Getxoko Udalagaz elkarlanean. Bertan parte hartuko duten ekoizleak Euskadiko hainbat txokotatik etorriko dira, gehienak Bizkaitik, eta euren produktuak zuzenean ezagutzeko eta erosteko aukera izango dute bertaratzen direnek.
Askotariko produktu ekologikoak aurkituko dira postuetan: barazkiak, gaztak, marmeladak, ogia, lekaleak, eztia eta txakolina, besteak beste. Azokaren helburua nekazaritza ekologikoa herritarrengana hurbiltzea eta ekoizpen zein kontsumo arduratsuagoa sustatzea da.
Udalak nekazaritza ekologikoak substantzia eta prozesu naturalak lehenesten dituela nabarmendu du, ingurumenaren gaineko eragina ahalik eta gehien murrizteko. Carlos Sergio Ingurumen zinegotziaren berbetan, eredu horrek klima-, ingurumen- eta osasun-erronkei aurre egiteko bidea eskaintzen du.