Mozketak ez dira ordutegi berean izango egun guztietan. Eguenean, irailaren 17an, 20:00etatik gauerdira itxiko dute sarbidea; barikuan, 18:00etatik 02:00etara; zapatuan, 10:00etatik 02:00etara; eta domekan, 10:00etatik 21:00etara.
Hala ere, ez da erabateko itxiera izango. Inguruan bizi diren eta dagokien baimena duten bizilagunak autoz sartu ahal izango dira. Era berean, egun horietarako Portu Zaharreko jatetxe batean aldez aurretik erreserba egin dutenek ere pasatzeko aukera izango dute, betiere erreserba egiaztatzen badute.
Trafiko-mozketak DalecandELA Fest jaialdiaren bosgarren edizioagaz batera egingo dituzte. Aurten, jaialdiak lau egun eta 20 musika-talde baino gehiago izango ditu, eta sarrera doakoa izango da. Duncan Dhu, Kiko Veneno, Sidonie, Quique González, Neomak, Smile, Akatz eta Diamond Dogs dira Portu Zaharreko agertokietatik igaroko diren izenetako batzuk.
Musikaz gain, kirol-jarduerak, umeentzako proposamenak eta gastronomia ere izango dira. DalecandELA elkarteak antolatutako jaialdiaren helburua Alboko Esklerosi Amiotrofikoa (ELA) ikusaraztea eta gaixotasunaren ikerketarako zein ELA duten pertsonei laguntzeko dirua biltzea da. Iazko edizioak 18.000 lagun baino gehiago batu zituen eta, antolatzaileen arabera, 160.000 euro baino gehiago bideratu ziren ikerketara eta laguntzetara.