Ibilbidean zehar topatzen dituzten landare eta landare-komunitateei erreparatuko diete. Prietok espezieak identifikatzen lagunduko du, haien ezaugarriak azalduko ditu eta ekosisteman betetzen duten funtzioa ezagutaraziko du. Paisaiaren eta ingurunearen bestelako bitxikeriak ere izango dituzte berbagai.
Bolue Getxoko biodibertsitate-gune esanguratsuenetako bat da. Hezeguneak 12 hektarea inguru ditu, eta azken urteetan egindako ikerketek haren balio ekologikoa nabarmendu dute; besteak beste, 2004tik 149 hegazti-espezie behatu dituzte hezegunean eta haren inguruan.
Irteera egiteko ez da sasoi fisiko berezirik beharko; hau da, antolatzaileek azaldu dutenez, ibilbidea ez da luzea izango eta ez du zailtasunik izango. Helduentzat eta 10 urtetik gorako umeentzat dago pentsatuta; gazteagoek ere parte hartu ahal izango dute heldu bategaz joanez gero.
Hitzordua 09:30ean izango da, Bolueko Hezeguneko Ponpen Etxolan. Plazak mugatuak dira eta parte hartu gura dutenek aurretik eman beharko dute izena boluenatura@gmail.com helbidera idatzita.
Irteera Getxonatura, ezagutu eta zaindu egitasmoaren barruan egingo dute. Hilero antolatzen dituzten jardunaldietan askotariko gaiak landu dituzte orain arte: natura-argazkigintza, gaueko harrapariak eta tximeletak behatzeko teknikak, anfibioak, landare inbaditzaileak edota hegazti eta saguzarrentzako habia-kaxak, besteak beste.