Antolatzaileek azaldu dutenez, kontzeptua itsas mareatik abiatzen da, eta jaialdiak irudien mugimenduagaz eta eraldaketagaz lotzen du. Aurtengo ideia argazkiak eta irudiak ez direla "objektu estatikoak" erakustea da: zirkulatu egiten dute, testuinguruz aldatzen dira, artxibatu eta berreskuratzen dira, eta une bakoitzean esanahi berriak har ditzakete. Hori dela eta, adierazi dutenez, 2027ko edizioak "memoria, gizartea, ekologia, ekintza kolektiboa edo ezkutuan geratutako errealitateak" lantzen dituzten proposamenak bilatuko ditu.
Deialdi honen izen-ematea joan den astean, irailaren 24an, ireki zuten, eta azaroaren 3an itxiko dute. Urtero bezala, argazkigintzako proiektuak ez ezik, bideoa, instalazioa, performancea, arte digitala eta bestelako praktika bisualak aurkez daitezke, eta proposamenak gaztelaniaz edo ingelesez bidali behar dira.
Aurten, Monica Allendek, Victoria Ismachek, John Fleetwoodek eta Cale Garridok osatutako epaimahaiak 12 finalista aukeratuko ditu; eta horietatik hiru irabazleak izango dira. Hautaketa hori egiteko, lanaren "kalitate artistikoa, garapen kontzeptuala eta Marea gaiagaz duen lotura" baloratuko dituzte, baita genero-parekotasun eta inklusio irizpideak ere. Adierazi dutenez, finalisten zerrenda azaroaren 26an argitaratuko dute eta hiru irabazleak azaroaren 30ean jakinaraziko dituzte.
Gainera, hiru irabazle horien lanak Getxophoto 2027ko programazioan sartuko dira. Jaialdiak erakusketa edo instalazioaren produkzio-gastuak ordainduko ditu, eta, horrez gain, artista bakoitzak 500 euroko ordainsaria, inaugurazio-astean bi gaueko ostatua, 150 eurora arteko bidaia-laguntza eta komunikazio-estaldura jasoko ditu.