Areetako Geltokia plazan kokatuko dute azokaren merkataritza-gunea. Bertan, liburu-dendek, argitaletxeek eta merchandising dendek euren postuak jarriko dituzte, eta bisitariek komiki zein nobela grafikoetako azken nobedadeak ezagutu, bildumak osatu edo bildumazaleentzako aleak eskuratu ahal izango dituzte.
Azokaren beste ardatza Romo Kultur Etxea izango da. Hiru egunetan hitzaldiak, egile eta sektoreko profesionalekaz topaketak, aurkezpenak, sinadura-txandak eta ume zein helduentzako tailerrak egingo dituzte. Profesionalentzako masterclass bat ere izango da, argitalpen-proiektu bat zelan aurkeztu eta garatu lantzeko. Bi guneetarako sarrera doakoa izango da.
Aurtengo gonbidatuen artean Lorenzo Montatore, Teresa Valero, Juan Diaz Canales, Nuria Tamarit, Miguel Brieva, Borja Gonzalez, Clara eta Olivia Cabez, Laurielle eta Teresa Ferreiro daude. Horiez gain, Miguelanxo Prado egileak eta Laureano Domínguez editore eta dibulgatzaileak aurtengo omenaldi-saria jasoko dute, komikiaren munduan egindako ibilbideagatik.
Adimen artifiziala, eztabaidagai
Komikigintzaren gaur egungo eztabaidetako batek ere izango du lekua egitarauan. Romo Kultur Etxean "La IA deshumaniza: ¿a quién beneficia?" erakusketa ikus daiteke irailaren 29tik urriaren 30era. Komiki Egileen Kolektiboak komisariatu du, eta adimen artifizial sortzaileak sorkuntza artistikoan duen eraginaren inguruko hausnarketa proposatzen du, giza sormenaren eta talentuaren balioa aldarrikatuz.