Udalak aipatu duenez, klima-aldaketari buruz ikasteko eta parte hartzeko askotariko jarduerak antolatuko dituzte. Helburua ingurunea zaintzearen garrantziaz jabetzea eta klima-aldaketaren ondorioak hobeto ezagutzea izango da.
Barikuan, Getxon barrena, berdeguneek, arkitekturak eta hirigintza jasangarriak berotik babesten eta klima-aldaketara egokitzen nola lagun diezaguketen ezagutzeko, ibilbide bat antolatu dute. 11:00etatik 13:00etara izango da eta Bizkaia Zubia plazan hasiko da. 12:00etatik 13:30era, Areetako Geltokia plazan, balkoietan euri-ura biltzeko tailerra egingo dute.
Aste-akabuan, zapatuan, Asteklima Azoka jarriko dute, klima aldaketakaz lotutako karpa eta jolasakaz. 11:30etik 15:00etara eta 17:00etatik 18:30era egongo da irekita Algortako Geltokia plazan; eta, euria egiten badu, San Nikolas plazako frontoira eramango dute.
Domekan, 11:30etik 15:00etara, Areetako Geltokia plazan familiako klima tailerrak egingo dituzte. Hainbat motatakoak izango dira: lore ontzietan haziak ereiteko, buztina moldatzeko edo usain poltsatxoak eta xaboia egiteko tailerrak, besteak beste.
Astelehenean, 18:00etatik 13:30era, pertsonalizazio tailerra egingo dute Getxoko Elkartegian. Bertan, gogoko dugun arropa eta objektuei bizitza berri bat emateko aukera egongo da. 18:30etik 20:00etara, Itzubaltzeta/Romoko Kultur Etxean, energia berriztagarriak ezagutzeko tailerra egingo dute. Eguzki- eta haize-energiak ezagutarazteko helburuagaz, eguzki-energia darabilten etxe bat eta auto elektriko bat sortzeko tailerra izango da.
Martitzenean, 17:30etik 19:00etara, San Nikolas Plazan, elikagaien xahutzearen aurkako tailer praktikoa antolatuko dute. Erosketa arduratsua egiten, hozkailua antolatzen eta batch cooking teknika erabiltzen ikasteko helburuagaz. 17:30etik 19:00etara berriz, landareak nola zaindu erakutsiko dute Algortako Geltokia Plazan.
Eguaztenean, 18:00etatik 19:30era, Eskoletako plazan, materiak birziklatuakaz batukada bat sortzeko tailerra antolatuko dute; hondakinak instrumentu bihurtzen ikasteko, eta tresna horiekaz batukada erakustaldi bat egiteko. Aldi berean, liburu-truke bat antolatuko dute istorioak partekatzeko, irakurketa sustatzeko eta planeta zaintzeko helburuagaz.
Eguenean, konposta egiteko tailerraren txanda izango da. 12:00etatik 13:30era, Areetako Geltokia plazan, materia organikoa modu errazean birziklatzeko moduak, konpostagailu txiki bat egiten eta lorategiko konpostagailua erabiltzen irakatsiko dute. Arrastian, 18:00etatik 19:30era, etxetresna elektriko txikiak konpontzeko tailerra egingo dute; euren bizitza erabilgarria luzatzeko eta ingurumenean duten eragina murrizteko helburuagaz.
Jardueretan izena emateko epea dagoeneko irekita dago, lanorduetan, telefonoz 605 749 064 deituz, edo asteklimagetxo@gmail.com e-postara idatziz.