Metro Bilbaok trenbidea berritzeko lanak hasiko ditu barikuan, Gobela, Neguri eta Aiboa arteko tartean. Lanek irauten duten bitartean, Etxebarrirantz doazen trenek abiadura moteldu beharko dute inguru horretatik igarotzean. Horrek ordutegietan eraginik izan ez dezan, irteerak minutu batzuk aurreratzea erabaki dute.
Aldaketa abenduaren 17ra arte egongo da indarrean, baina trenak ez dira gutxiagotan pasatuko: ohiko maiztasunak mantenduko dituzte. Hori bai, Metro Bilbaok ordutegi berriak begiratzeko gomendatu die erabiltzaileei, batez ere goizeko lehen metroak hartzen dituztenei, trena galdu ez dezaten.
Zer egingo dute Gobela, Neguri eta Aiboa artean?
Guztira, 1.761 trabes aldatuko dituzte; hau da, errailen azpian dauden eta trenbideari eusten dioten piezak. Lan horien bidez, trenbidea egoera onean mantendu eta metroaren segurtasuna bermatu gura dute.
Izan ere, tarte horretan bihurgune estuak daude, eta trenbidea etxebizitzetatik oso gertu igarotzen da. Horregatik, mantentze-lanak bereziki garrantzitsuak direla azaldu du Metro Bilbaok.
Ordutegi berriak Metro Bilbaoren webgunean kontsulta daitezke.