Udalaren arabera, proiektuaren helburua ez da gazteleku berri bat hutsetik sortzea, baizik eta gaur egun Urgull kaleko udal-eraikinaren hirugarren solairuan dagoen GauEgun Gaztelekua Algortako Merkatura lekualdatzea. Kokapen berria Kantxa Kirol Moda saltoki zaharrak hartzen zuen lokalean egongo da.
Lokal berriak 270 metro koadro erabilgarri izango ditu eta 40 bat erabiltzailerentzako edukiera aurreikusten da. Egungo GauEgun zerbitzua bezala, 11 eta 17 urte arteko gazteei zuzenduta egongo da; eta Udalaren planteamendua leku "malguago, irisgarriago eta erdigunekoago" bat sortzea da.
Aurreikusi duten moduan, barruan hainbat gune egongo dira: elkartzeko eta irakurtzeko gunea, ordenagailuak, bideo-jokoak, mahai-futbola, ping-ponga, sukalde-office txiki bat, tailerrak egiteko espazioak eta ongizate emozionalerako edo "babesleku emozionalerako" gune espezifikoa. Gainera, Udalak komun inklusiboak eta hezitzaile-taldearentzako bulegoak ere egongo direla aurreratu du.