Getxon turismo-tasa ezartzeko hainbat aldaketa proposatu ditu EH Bilduk, udalerrian turismo-eredu bidezkoagoa eta jasangarriagoa sustatzeko helburuagaz. Koalizioaren ustez, bisitariek euren egonaldiak sortzen duen eraginaren araberako ekarpena egin beharko lukete, eta, horretarako, gurutzontziei, luxuzko hotelei eta turismo-apartamentuei gehieneko tasa aplikatzea eskatu du.
Alderdiak proposamenaren oinarrian progresibitatea eta ekitatea daudela azaldu du. Izan ere, taldearen iritziz, ez litzateke bidezkoa izango ostatu merke batean geratzen den bisitariak eta luxuzko hotel batean ostatu hartzen duenak zerga bera ordaintzea. "Gehiago duenak, gehiago ordain dezala" da koalizioak defendatzen duen irizpide nagusia.
Neurriaren eragina azaltzeko, adibide bat ere jarri du alderdiak: bost izarreko hotel batean egonaldiagatik 1.500 euro ordaintzen dituen pertsona batek beste 58 euro ordainduko lituzke EH Bilduk proposatutako zenbatekoen arabera. Guztira, beraz, 1.558 euroko gastua izango luke. Koalizioaren ustez, "kopuru hori igoera neurritsua da maila horretako ostatu bat ordaintzeko aukera duen pertsonarentzat".
Turismoaren onurak herritarren artean banatzeko
EH Bilduren arabera, turismo-tasa ez litzateke diru-bilketa hutsera mugatu behar. Bisitariek turismo-jardueragaz lotutako gastuetan eta zerbitzu publikoen finantzaketan laguntzeko tresna ere izan beharko luke, udalerriaren eta bertako bizilagunen ongizatea bermatzeko.
Ildo horretan, Getxok turismo-eredu bidezkoago baterantz aurrera egin behar duela defendatu du koalizioak, eta turismoak sortzen dituen onura ekonomikoak herritar guztiengana iristearen garrantzia azpimarratu du: "EH Bildu Getxon turismoak herritar guztientzako onurak sortu behar dituela defendatzen dugu, eta haren ekarpen ekonomikoa modu bidezkoan banatu behar dela".