Azaldu dutenez, erabilera anitzeko kirol-instalazioei emango diete lehentasuna, hainbat kirol-modalitate praktikatzeko aukera ematen dutenei, hain zuzen ere. Era berean, eraikinak aldagelak, atsedenerako eta itxaroteko guneak, bilera-gelak eta gimnasio bat izan beharko ditu, erabilera partekatuko printzipio horri berari jarraituz.
Ekipamendu zehatzei dagokienez, getxotarren eskariari erantzuteko, skatepark bat eta eskaladarako boulder instalazio bat jarriko dituzte, herritarrek jarduera horiek egiteko beste herri batzuetara joan behar izan ez dezaten.
Gainera, adostuaren arabera, proiektuak hiru pilotaleku izan beharko lituzke, euskal pilotaren modalitate desberdinak praktikatzeko aukera emango luketenak eta beste kirol batzuek ere erabili ahal izango lituzketenak. Gainerako espazioak ere erabilera anitzekoak izatea proposatu dute, besteak beste, arku-tiroa, mahai-tenisa, badmintona, patin-hockeya, boxeoa, gimnasia erritmikoa edo zirkuko jarduerak egiteko aukera eman dezaten.
Bestalde, bi lan-saioetan, argiztapenari, baldintza akustikoei, erabiltzaileentzako aparkalekuen optimizazioari, mugikortasun jasangarriaren aldeko neurrien ezarpenari eta eraikinerako sarbideen hobekuntzari eta modernizazioari buruzko beharrak ere aztertu dituztela adierazi dute.
Orain, parte-hartze fasea amaituta, Getxo Kirolakek ikuspegi teknikotik, antolakuntzaren aldetik eta aurrekontuari dagokionez balioztatu beharko ditu kirol-espazioei eta horien erabilerei lotutako proposamenak, etorkizuneko aurreproiektua lantzen hasi aurretik.