Udalak aurreratu duenez, bi tailer desberdin egingo dituzte, Fernando Jubete entomologo eta
naturalista adituaren eta Xabi Buenetxea BOLUE Ingurumen Ikerketak-eko kidearen eskutik.
Lehenengoa, Itzubaltzeta/Romo Kultur Etxean egingo dute, 10:00etatik 13:30era. Helburua bilduma entomologikoen –intsektuen eta beste artropodo batzuen bildumen– garrantzia, horiek prestatzeko prozesua eta erabiltzeko irizpide etikoak azaltzea izango da. Bertan, parte-hartzaileek hegalak "manipulatzeko, muntatzeko eta zabaltzeko oinarrizko prozedurak" ikasiko dituzte, baita "lehortzeko, etiketatzeko eta kontserbatzeko" jarraibideak ere.
Era berean, jardueran genitaliak –ugalketa- eta sexu-organoen multzoa– erauzteko, garbitzeko eta prestatzeko prozedurak landuko dituzte, material optikoagaz behatu ahal izateko. Arreta berezia jarriko dute prozedura horiek kanpo-itxura antzekoa duten espezieak bereizteko duten erabilgarritasunean.
Bigarrena gauez egingo dute, 20:00etatik 24:00etara, Azkorriko itsaslabarretan. Hala ere, eguraldiaren arabera lekua alda daitekeela jakinarazi dute. Tailer horretan, sitsak erakartzeko argi-tranpa batzuk jarriko dituzte. Horren helburua antzemandako aleak sailkatzea eta identifikatzea, eta euren biologiari, taxonomiari eta beste bitxikeria batzuei buruzko xehetasunak azaltzea izango da.
Parte hartzeko izena ematea beharrezkoa izango da: boluenatura@gmail.com helbidera idatziz eta egin gura den tailerra adieraziz –tailer teknikoa, gaueko landa-jarduera edo biak–.